Çekia tha të mërkurën se është e hapur për një diskutim në Bashkimin Evropian mbi zvogëlimin e mbrojtjes së përkohshme për refugjatët ukrainas, transmeton Anadolu.

Sipas Radio Prague, ministri i Brendshëm Lubomir Metnar tha se ata janë të hapur për një debat brenda BE-së mbi ndryshimin e kushteve të mbrojtjes së përkohshme për refugjatët ukrainas.

Qeveria çeke kërkon të zvogëlojë fushën e mbrojtjes ndërsa gati 398 mijë ukrainas mbeten me status të përkohshëm, me afërsisht 6.000 të sapoardhur çdo muaj.

Fusha e kufizuar e mbrojtjes mund të bazohet në origjinën gjeografike ose kritere të tjera.

Duke folur pas bisedimeve në Berlin me homologun e tij gjerman Alexander Dobrindt, Metnar bëri thirrje për masa më të rrepta kundër migracionit të paligjshëm, kthime më të shpejta dhe mundësinë e krijimit të qendrave të kthimit jashtë bllokut.