Çekia kritikoi Hungarinë të martën për shkak të refuzimit të saj për të mbështetur sanksionet ndaj energjisë ruse, transmeton Anadolu Agency (AA).

“Vendimi dhe qasja e qeverisë hungareze për të mos mbështetur asnjë sanksion që synon eksportet ruse të energjisë është i papranueshëm”, shkroi ministri i Jashtëm çek, Jan Lipavsky në Twitter.

Ai i referohej vetos së Hungarisë lidhur me propozimin e Bashkimit Evropian për të ndaluar energjinë ruse, e cila synon të pengojë aftësinë e Rusisë për të financuar luftën e saj kundër Ukrainës.

"Vendimi i Hungarisë erdhi në një kohë kur Evropa duhet të jetë e bashkuar më shumë se kurrë", shtoi Lipavsky.

Ndërkohë, radioja shtetërore "Prague International" tha se ndalimi i naftës ruse i propozuar nga Komisioni Evropian në fillim të majit do të ishte sanksioni më i ashpër si përgjigje ndaj operacionit ushtarak të Moskës në Ukrainë.

Ndërsa embargoja është planifikuar të hyjë në fuqi në vitin 2023, Hungarisë dhe Sllovakisë i është dhënë një përjashtim deri në fund të vitit 2024 ndërsa Çekisë deri në mesin e 2024, shtoi ai.

Të paktën 3.668 persona janë vrarë dhe 3.896 janë plagosur në Ukrainë që kur Rusia filloi luftën e saj më 24 shkurt, sipas vlerësimeve të OKB-së. Numri i vërtetë besohet të jetë shumë më i lartë.

Më shumë se 6.2 milionë njerëz kanë ikur në vende të tjera dhe 7.7 milionë të tjerë janë zhvendosur brenda vendit, sipas Agjencisë së OKB-së për Refugjatët.