Bolivi, presidentja e përkohshme miraton ligjin për zgjedhje të reja
Ligji ia ndalon ish-presidentit Evo Morales që të kandidojë në çfarëdo zgjedhje
Buenos Aires
Presidentja e përkohshme e vetëshpallur e Bolivisë, Jeanine Anez, miratoi ligjin me të cilin bëhet thirrje për zgjedhje të reja presidenciale dhe i cili ia ndalon kandidimin ish-presidentit Evo Morales, raporton Anadolu Agency (AA).
Ligji i quajtur "Regjimi i jashtëzakonshëm dhe i përkohshëm për zgjedhjet e përgjithshme" fillimisht u miratua nga Senati dhe nga Dhoma më e Ulët e Parlamentit të Bolivisë, Dhoma e Deputetëve.
Ligji ia ndalon kandidimin çdonjërit që ka shërbyer dy mandatet e fundit radhazi si president, gjë që do të përjashtonte ish-presidentin Morales.
Trazirat në Bolivi filluan në tetor, kur presidenti indigjen Evo Morales fitoi mandatin e katërt dhe u përball me rezistencë të menjëhershme nga partitë e opozitës që sfiduan rezultatet e zgjedhjeve. Protestuesit dolën në rrugë duke pretenduar mashtrime gjatë votimit.
Pas trazirave disajavëshe, Morales dha dorëheqjen nën presionin e ushtrisë dhe u transferua në Meksikë, ku iu ofrua azil politik.
Senatorja e atëhershme Jeanine Anez, një konservatore e opozitës, më pas e shpalli veten presidente të përkohshme.
Ndërkohë, demonstratat kanë vazhduar të mbahen nga mbështetësit kryesisht ruralë dhe indigjenë të Moralesit, përfshirë edhe kryeqytetin La Paz, që kur Morales u largua nga vendi.
Mbështetësit e Moralesit këmbëngulin se rrëzimi i ish-presidentit të zgjedhur ishte një grusht shteti.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.