Bashkimi Evropian ka paraqitur një kuadër për të lehtësuar hyrjen e ndihmave humanitare në Gaza, por ai mbetet vetëm “i zbatuar pjesërisht” për shkak të sfidave në sigurimin e shpërndarjes së sigurt dhe të organizuar, deklaroi Komisarja e BE-së për Mesdheun, Dubravka Šuica, raporton Anadolu.

Duke folur në një konferencë të nivelit të lartë të OKB-së për zgjidhjen me dy shtete në selinë e Kombeve të Bashkuara në New York, Šuica tha: “Presim që Izraeli të përmbushë marrëveshjen, gjë që nuk po ndodh për momentin”.

Më 10 korrik, BE-ja dhe Izraeli ranë dakord për një sërë masash urgjente humanitare, përfshirë shtimin e numrit të kamionëve të ndihmave, hapjen e pikave të reja kufitare dhe rifillimin e rrugëve të ndihmës përmes Jordanisë dhe Egjiptit për të përmirësuar situatën në Gaza.

Šuica theksoi nevojën urgjente për një “paketë mbështetëse për paqen të kushtëzuar dhe shumëdimensionale”, e cila do të vihej në zbatim menjëherë pas një zgjidhjeje të negociuar me dy shtete, të bazuar në të drejtën ndërkombëtare.

“Mbështetja për Autoritetin Palestinez është thelbësore”, theksoi ajo, duke shtuar se BE-ja është tashmë donatori më i madh për këtë autoritet.

“Po e mbajmë Autoritetin Palestinez nga kolapsi financiar dhe kemi shtuar angazhimin tonë për të arritur një armëpushim dhe për të përmirësuar qasjen për ndihmën humanitare”, tha ajo.

Komisarja përsëriti mbështetjen e plotë të bllokut për një zgjidhje me dy shtete, duke thënë: “Jemi plotësisht të përkushtuar për të arritur paqe të qëndrueshme në rajon dhe mbështesim zgjidhjen me dy shtete në përputhje me të drejtën ndërkombëtare. Duam të shohim Izraelin dhe Palestinën të jetojnë krah për krah në paqe dhe siguri, brenda kufijve të njohur”.

Šuica gjithashtu theksoi rëndësinë e ndërtimit të një arkitekture rajonale të sigurisë që respekton si shqetësimet për sigurinë e Izraelit, ashtu edhe sovranitetin palestinez, dhe bëri thirrje për aktivizimin e një mekanizmi ndjekës për përpjekjet për paqe, duke nënvizuar Aleancën Globale për Zbatimin e Zgjidhjes me Dy Shtete.