Shefja e politikës së jashtme të Bashkimit Evropian, Kaja Kallas përsëriti sot nevojën për mbështetjen e Belgjikës ndërsa blloku shkon në një takim për të vendosur nëse do të përdorë asetet shtetërore ruse të ngrira për Ukrainën, duke thënë se nuk do të largohen pa marrë rezultat, transmeton Anadolu.

"Ne nuk do të largohemi nga takimi (i së enjtes) para se të marrim rezultate, para se të marrim vendimin për financimin e Ukrainës. Opsioni më i besueshëm është kredia e dëmshpërblimeve dhe kjo është ajo për të cilën po punojmë", u tha Kallas gazetarëve ndërsa ministrat e Jashtëm të BE-së u mblodhën në Bruksel.

Ajo tha se masa e kredisë së dëmshpërblimeve dërgon "sinjal të qartë" se kushdo që shkakton dëme të tilla në një vend tjetër duhet të paguajë për dëmshpërblimet. "Pa Belgjikën, nuk do të ishte shumë e lehtë, sepse ata kanë shumicën e aseteve dhe mendoj se është e rëndësishme që ata të jenë dakord", theksoi Kallas.

Ndërsa diskutimet mbi një armëpushim të mundshëm dhe një kuadër paqeje vazhdojnë, Kallas nënvizoi nevojën për garanci "të prekshme" sigurie për Ukrainën. "Ato nuk mund të jenë letra apo premtime. Ato duhet të jenë trupa të vërteta, aftësi të vërteta në mënyrë që Ukraina të jetë në gjendje të mbrojë veten", tha ajo.

Duke iu referuar kërkesës së Rusisë për tërheqjen e Ukrainës nga rajoni i Donbasit si pjesë e negociatave të armëpushimit, Kallas nënvizoi se rajoni nuk është "loja përfundimtare" e Moskës.

"Nëse merr Donbasin, atëherë fortesa është shembur dhe pastaj ata patjetër vazhdojnë me marrjen e të gjithë Ukrainës", shtoi kryediplomatja e BE-së. Kallas bëri thirrje për paqe të qëndrueshme duke theksuar se nuk duhet të ketë "asnjë qetësim të agresorit".

Të premten, blloku vendosi të "mobilizojë për një kohë të pacaktuar" asetet ruse ndërsa udhëheqësit e BE-së do të vendosin për ndarjen e fondeve për Ukrainën në një samit në Bruksel më 18-19 dhjetor.