Bashkimi Evropian (BE) shprehu shqetësim serioz për dhunën në rritje në rajonin e Darfurit të Sudanit, transmeton Anadolu.

Zëdhënësi i Komisionit të BE-së, Anouar El Anouni, foli me gazetarët në konferencën e tij të përditshme për shtyp.

El Anouni theksoi vështirësitë në aksesin në ushqim, ujë dhe furnizime mjekësore pas rrethimit nga Forcat e Mbështetjes së Shpejtë (RSF) në Darfur, duke theksuar se kjo situatë po prek qindra mijëra civilë.

Aii deklaroi se situata është e tmerrshme dhe se BE-ja është seriozisht e shqetësuar për dhunën në rritje. Ai u bëri thirrje të gjitha palëve të arrijnë një marrëveshje në përputhje me rezolutën e OKB-së dhe të heqin bllokadën e aksesit në ndihmë humanitare.

El Anouni deklaroi se BE-ja po e monitoron nga afër situatën me partnerët e saj, duke thënë: "Të gjitha shkeljet e ligjit ndërkombëtar humanitar duhet të dokumentohen dhe ata që janë përgjegjës duhet të mbahen përgjegjës".

- Konflikti në Sudan

Sudani ka qenë skenë e përleshjeve të dhunshme midis ushtrisë dhe RSF-së që nga 15 prilli 2023.

Më shumë se 14 milionë njerëz janë zhvendosur si brenda vendit ashtu edhe jashtë vendit për shkak të konfliktit, i cili ka shkaktuar krizën më të madhe humanitare në botë.

Ndërsa forcat e ushtrisë kanë rimarrë kontrollin e zonave qendrore të vendit, veçanërisht kryeqytetit, Khartum, RSF është zhvendosur drejt perëndimit.

RSF, e cila kontrollon kryeqytetet e katër prej pesë provincave të Darfurit, ka rrethuar El Fasherin, kryeqytetin e Darfurit të Veriut, që nga maji 2024 dhe ka nisur sulme të përsëritura për të rimarrë qytetin.

Më 26 tetor, RSF pretendoi se kishte pushtuar Divizionin e 6-të të Këmbësorisë të ushtrisë në El Fasher. Ushtria ende nuk ka lëshuar deklaratë.