Australia dhe Indonezia kanë dënuar bashkërisht veprimet izraelite në Gaza, duke paralajmëruar se çdo përpjekje për të ndryshuar përbërjen demografike të territorit ose për ta bërë pushtimin e tij të përhershëm është e paligjshme dhe duhet të ndalet menjëherë, transmeton Anadolu.

Në një deklaratë të përbashkët të lëshuar pas Takimit të 9-të të Ministrave të Jashtëm dhe të Mbrojtjes Australi-Indonezi 2+2 në Canberra, të dy vendet bënë thirrje për rifillimin e menjëhershëm të armëpushimit, lirimin e të gjithë pengjeve të mbetura dhe shpërndarjen e papenguar të ndihmës humanitare në Gaza.

"Ata gjithashtu hodhën poshtë të gjitha veprimet dhe politikat izraelite për të marrë kontrollin e Gazës, për të ndryshuar përbërjen demografike të Gazës dhe për të përkeqësuar më tej krizën katastrofike humanitare. Ministrat ritheksuan nevojën që të gjitha palët të zbatojnë ligjin ndërkombëtar, përfshirë ligjin ndërkombëtar humanitar, punonjësit e ndihmës humanitare duhet të mbrohen", thuhet në deklaratë.

Në takim morën pjesë zëvendëskryeministri dhe ministri i Mbrojtjes i Australisë, Richard Marles, ministrja e Jashtme, Penny Wong dhe homologët e tyre indonezianë, ministri i Jashtëm Sugiono dhe ministri i Mbrojtjes Sjafrie Sjamsoeddin.

Ministrat diskutuan gjithashtu luftën Rusi-Ukrainë dhe riafirmuan respektin e tyre për sovranitetin, pavarësinë politike dhe integritetin territorial të Ukrainës, duke kërkuar mbështetje nga bashkësia ndërkombëtare për t'i dhënë fund luftës.

Izraeli ka vrarë të paktën 63.000 palestinezë në Gaza që nga tetori i vitit 2023. Fushata ushtarake ka shkatërruar enklavën.

Në nëntorin e kaluar, Gjykata Ndërkombëtare Penale lëshoi ​​urdhërarreste për kryeministrin izraelit, Benjamin Netanyahu dhe ish-ministrin e Mbrojtjes, Yoav Gallant, për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.