Gjashtë të burgosur palestinezë janë arratisur nga një burg në Izrael duke gërmuar tunel, thanë autoritetet izraelite, transmeton Anadolu Agency (AA).

Sipas një lajmi të transmetuesit zyrtar izraelit KAN, i cili ka cituar Administratën e Burgjeve, forcat e sigurisë vazhdojnë të kërkojnë gjashtë palestinezë të cilët u arratisën mbrëmë nga tuneli që kishin hapur nga burgu Gilboa në veri të vendit.

Sipas lajmit, në mesin e të arratisurve është një anëtar i grupit Dëshmorët e Al-Aksasë, krahut të armatosur të organizatës Fatah, si dhe një i Xhihadit Islam.

Thuhet se të arratisurit qëndruan në të njëjtën qeli në burg dhe gërmuan tunel prej dhjetë metrash.

Gjersa theksohet se kërkimi për palestinezët në ikje vazhdon me ndihmën e helikopterëve dhe mjeteve ajrore pa pilot, gazeta izraelite Maarif njoftoi se shumë roje sigurie janë dërguar në rajon dhe se po zhvillohen operacione intensive kërkimi.

Nga ana tjetër, faqja e internetit Walla News shkroi se të gjithë të arratisurit ishin të dënuar me burgim të përjetshëm.

I hapur në vitin 2004, burg Gilboa thuhet të jetë një nga burgjet më të rrepta në Izrael.