STAMBOLL (AA) - Armëpushimi midis Izraelit dhe Iranit hyri në fuqi mëngjesin e sotëm pas armiqësive të intensifikuara, transmeton Anadolu.

Ushtria izraelite konfirmoi se gjithsej 11 raketa u lëshuan në gjashtë valë të njëpasnjëshme nga Irani në orët para armëpushimit.

Sipas shërbimit mjekësor të urgjencës izraelite, të paktën gjashtë persona u vranë dhe 15 u plagosën, disa në gjendje kritike, pasi një raketë goditi një ndërtesë banimi në qytetin jugor të Beershebas.

Shpërthime u njoftuan gjithashtu në Tel Aviv dhe Izraelin qendror, thanë mediat izraelite.

Media iraniane gjithashtu konfirmoi fillimin e armëpushimit, duke deklaruar se ai hyri në fuqi pas "sulmeve të fundit" me raketa.

Autoriteti Izraelit i Transmetimit dhe radioja ushtarake raportuan më parë se armëpushimi kishte filluar, ndërsa zyrtarët izraelitë vazhduan të përmbaheshin nga komentet zyrtare.

Kryeministri izraelit, Benjamin Netanyahu, kishte udhëzuar anëtarët e kabinetit të mos flisnin publikisht për armëpushimin.

Presidenti i SHBA-së, Donald Trump, mbrëmë njoftoi se është arritur një "armëpushim i plotë dhe total" midis Izraelit dhe Iranit dhe se në këtë mënyrë lufta do të përfundojë, ndërsa në mëngjes kishte njoftuar se armëpushimi ka filluar.

Media izraelite raportoi se Katari kishte ndërmjetësuar marrëveshjen.