Arabia Saudite kritikon vizitën e presidentit izraelit në Xhaminë Ibrahimi në Bregun Perëndimor
Ministria e Jashtme saudite tha se vizita e presidentit të Izraelit shkel shenjtërinë e xhamisë në qytetin e Bregut Perëndimor
Riyad
Arabia Saudite dënoi vizitën e presidentit izraelit Isaac Herzog në Xhaminë Ibrahimi (Al-Haram Al-Ibrahimi) në qytetin El-Halil (Hebrin) në Bregun Perëndimor të pushtuar, për të shënuar festën hebraike Hanukkah, transmeton Anadolu Agency (AA).
Akti është një "shkelje flagrante e shenjtërisë së xhamisë", shkroi agjencia zyrtare e lajmeve të mbretërisë SPA, duke cituar një deklaratë nga Ministria e Jashtme saudite.
Vizita e tij është "armiqësore dhe provokon ndjenjat e muslimanëve në gjithë botën", tha ministria, duke shtuar se pushtimi izraelit mbart pasojat e kësaj lëvizjeje.
Herzog u fut me forcë në xhami të dielën për të marrë pjesë në një ceremoni të ndezjes së qirinjve të mbajtur si pjesë e festës Hanukkah.
Pas masakrës së vitit 1994 të 29 besimtarëve palestinezë brenda xhamisë nga koloni hebre ekstremist Baruch Goldstein, autoritetet izraelite e ndanë kompleksin e xhamisë midis adhuruesve muslimanë dhe hebrenj.
El-Halili është vendbanimi i rreth 160 mijë muslimanëve palestinezë dhe rreth 800 kolonëve hebrenj. Këta të fundit jetojnë në një seri enklavash të pastra hebreje të ruajtura mirë nga trupat izraelite.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
