Kompania ajrore franceze Air France do të vazhdojë të pezullojë fluturimet drejt disa destinacioneve të Lindjes së Mesme deri të martën për shkak të përshkallëzimit të tensioneve rajonale, tha të dielën ministri francez i Transportit, Philippe Tabarot, transmeton Anadolu.

"Për arsye sigurie dhe në koordinim me autoritetet shtetërore, Air France pezullon fluturimet e saj drejt Tel Avivit, Bejrutit, Dubait dhe Riadit deri të martën, më 3 mars", tha ministri i Transportit, Tabarot në një postim në platformën e mediave sociale X.

Ai tha se si fluturimet vajtje ashtu edhe ato vajtje-ardhje drejt qyteteve të prekura përfshihen në pezullim. Tabarot shtoi se kompania ajrore do të njoftojë një orar të azhurnuar fluturimesh në ditët në vijim, varësisht nga zhvillimet në rajon.

Ky veprim vjen mes tensioneve të larta në Lindjen e Mesme pas përshkallëzimeve të fundit ushtarake që përfshijnë SHBA-në, Izraelin dhe Iranin.

Disa vende kanë mbyllur përkohësisht hapësirën e tyre ajrore, duke bërë që shumë linja ajrore ndërkombëtare të pezullojnë ose të ridrejtojnë fluturimet për arsye sigurie.