Mbetjet nënujore të anijes britanike të ngarkesave “Thistlegorm”, e cila lundroi për të transportuar municione ushtarake nga Anglia në Egjipt gjatë Luftës së Dytë Botërore dhe u fundos nga avionët gjermanë në vitin 1941, ofrojnë një mundësi të veçantë për të dëshmuar një histori 84-vjeçare.

Mbyllur brenda saj shumë objekte që hedhin dritë mbi gjurmët e luftës, anija e fundosur Thistlegorm nuk është vetëm një pikë zhytjeje, por edhe një muze nënujor ku historia ndërthuret me botën e detit me një të kaluar 84-vjeçare.

Anija e fundosur, rreth 40 kilometra në perëndim të qytetit Sharm El-Sheikh në Egjipt, është ndër atraksionet kryesore të turizmit të zhytjes në Detin e Kuq. Si një nga anijet e fundosura më të famshme në botë, ajo vizitohet çdo ditë nga mesatarisht 150 deri në 200 zhytës.

Pamjet e kapura nga kamerat e Anadolus hapin një derë drejt botës së fshehur të Thistlegorm-it.

Mjetet e blinduara, torpedot, xhipat, pushkët, motorët BSA dhe Norton të përshtatur për kushtet e shkretëtirës dhe vagonë, të varrosur në ujërat e Detit të Kuq, hedhin dritë mbi të kaluarën, duke u shndërruar njëkohësisht edhe në strehë për shumë krijesa të gjalla.

Kafshët shumëngjyrëshe që kanë bërë shtëpi çdo cep të mbetjeve, nga kundërajrorët deri te motorët, u japin jetë mbetjeve të anijes.

Peshqit portokalli, të verdhë, rozë dhe ngjyrash të tjera që lëvizin në harmoni dhe në tufa, së bashku me koralet shumëngjyrëshe, shfaqin ekosistemin e pasur të Detit të Kuq.

Këtu është e mundur të shihen edhe “banorë të rregullt” të anijes së fundosur, si peshqit krokodil, peshqit papagall, skalari dhe breshkat “caretta caretta”.

Në luftë me kohën

Anija e ngarkesave Thistlegorm, me 49 anëtarë ekuipazhi, nëntë prej të cilëve oficerë të lartë britanikë, u nis më 2 qershor 1941 nga Glasgou drejt Aleksandrisë për udhëtimin e saj të fundit.

Duke transportuar automjete, kamionë, biçikleta, pjesë avionësh, vagona hekurudhorë dhe një lokomotivë për aleatët, anija u fundos gjatë udhëtimit të saj të katërt e të fundit.

Ndërsa priste e ankoruar për të hyrë në Kanalin e Suezit, Thistlegorm u sulmua mëngjesin e 6 tetorit nga avionë gjermanë të ngritur nga Kreta dhe u zhyt në ujë.

Bombardimi shkaktoi zjarr të shpejtë që solli shpërthimin e municioneve në hambar. Si pasojë e shpërthimit, Thistlegorm u nda më dysh dhe u fundos në më pak se një minutë.

Pesë anëtarë të marinës mbretërore dhe katër detarë humbën jetën në sulm, ndërsa pjesa tjetër e ekuipazhit arriti të shpëtonte para shpërthimit.

Shpërthimi që e fundosi Thistlegormin hodhi në erë pjesën më të madhe të mesit të anijes, duke e bërë rrënojën më të qasshme. Ajo ndodhet në një thellësi prej 32 metrash, duke ofruar kushte të përshtatshme për zhytje.

Me gjatësi 130 metra dhe gjerësi 18 metra, anija u zbulua në fillim të viteve 1950 nga eksploruesi i famshëm francez i deteve, Jacques-Yves Cousteau.

Pas vizitës nga Cousteau, anija u harrua pothuajse krejtësisht, përveçse nga peshkatarët vendas, derisa në fillim të viteve 1990 u shndërrua në një nga pikat më të kërkuara të zhytjes në Sharm el-Sheikh.

Megjithatë, Thistlegorm, që tërheq interes të madh, po përballet me vështirësi që të rezistojë ndaj kohës. Rritja e numrit të zhytësve dhe anijeve që e vizitojnë thuhet se po dëmton mbetjet.