Rreth 46 palestinezë të sëmurë dhe të plagosur u larguan nga Rripi i Gazës përmes pikës kufitare Rafah drej Egjiptit për trajtim, tha një burim mjekësor.

Terminali u rihap të shtunën pas më shumë se tetë muajsh mbyllje për shkak të operacioneve ushtarake izraelite në jug të Rripit të Gazës.

“Rreth 46 pacientë palestinezë dhe individë të plagosur, së bashku me shoqëruesit e tyre, u larguan nga Gaza përmes vendkalimit Rafah”, tha burimi për Anadolu.

Ai tha se pacientët me kancer përbënin shumicën e njerëzve që kaluan terminalin sot.

Sipas burimit, rreth 50 pacientë dhe individë të plagosur do të largohen çdo ditë nga Gaza për trajtim nën mbikëqyrjen e Organizatës Botërore të Shëndetësisë (OBSH).

Të shtunën, rreth 50 fëmijë dhe pacientë u larguan nga enklava, duke shënuar lëvizjen e parë nëpër vendkalimin Rafah që nga mbyllja e saj në maj 2024.

Më 19 janar, hyri në fuqi faza e parë gjashtëjavore e marrëveshjes së armëpushimit dhe e shkëmbimit të të burgosurve midis Hamasit dhe Izraelit, duke ndalur luftën gjenocidale të Tel Avivit që ka vrarë afro 47.500 njerëz dhe ka plagosur më shumë se 111.500 të tjerë që nga tetori i vitit 2023.

Gjykata Ndërkombëtare Penale lëshoi ​​urdhra arresti në nëntor të vitit të kaluar për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavë.