KUDS/ANKARA (AA) - Kryeministri izraelit Benjamin Netanyahu iu nënshtrua presionit nga presidenti i SHBA-së Donald Trump dhe lëshoi një deklaratë zyrtare në gjuhën angleze, duke shprehur “keqardhje të thellë” për bombardimin izraelit të Kishës së Familjes së Shenjtë në Gaza një ditë më parë, transmeton Anadolu.

Deklarata pasoi një telefonatë midis Trumpit dhe Netanyahut të enjten në mbrëmje, gjatë së cilës Trump shprehu “pakënaqësinë” e tij me sulmin dhe i kërkoi Netanyahut të sqaronte se ishte një gabim nga ana e Izraelit.

Shtëpia e Bardhë konfirmoi se Trump kërkoi shpjegim zyrtar nga Izraeli.

Të enjten, një sulm izraelit goditi kompleksin e Kishës së Familjes së Shenjtë në Gazën lindore, duke vrarë tre persona dhe duke plagosur nëntë të tjerë, përfshirë priftin Atë Gabriel Romanelli.

Patriarkana Latine e Kudsit konfirmoi viktimat dhe dënoi sulmin në një deklaratë publike.

Në përgjigjen e tij, Netanyahu pretendoi: “Izraeli shpreh keqardhje të thellë që një municion qorr goditi Kishën e Familjes së Shenjtë në Gaza”.

Ai shtoi se Izraeli “po e heton incidentin” dhe pretendoi se Tel Avivi “mbetet i përkushtuar për të mbrojtur civilët dhe vendet e shenjta”.

Ushtria izraelite tha se një hetim paraprak sugjeron që copëza nga një predhë e qëlluar gjatë operacioneve në zonë kishin goditur kishën. Ajo vuri në dukje se “burimi i incidentit është nën shqyrtim dhe mbetet subjekt i hetimeve të mëtejshme”.

Sot, një delegacion i lartë i krishterë hyri në Rripin e Gazës, i udhëhequr nga Kardinali Pierbattista Pizzaballa, Patriarku Latin i Jerusalemit dhe Patriarku Theofilos III i Kishës Ortodokse Greke.

Delegacioni vizitoi kishën për të shprehur ngushëllime, për të shprehur solidaritet dhe për të bërë thirrje për “një armëpushim të menjëhershëm, gjithëpërfshirës dhe të qëndrueshëm”, sipas një deklarate nga Patriarkana Latine.

Kisha e Familjes së Shenjtë është vendi i tretë i madh i krishterë që goditet nga forcat izraelite që nga fillimi i luftës. Sulmet e mëparshme goditën Kishën e Shën Porfirit dhe Kishën Baptiste në Gaza.

Duke refuzuar thirrjet ndërkombëtare për armëpushim, ushtria izraelite ka vazhduar me ofensivën brutale në Rripin e Gazës që nga 7 tetori i vitit 2023, duke vrarë të paktën 59 mijë palestinezë, shumica gra dhe fëmijë. Bombardimet e pamëshirshme kanë shkatërruar enklavën dhe kanë shkaktuar mungesë ushqimi dhe përhapje sëmundjesh.

Në nëntor të vitit të kaluar, Gjykata Ndërkombëtare Penale lëshoi urdhra arresti ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën në enklavën palestineze.