Në Fakultetin Ekonomik të Universitetit të Prishtinës (UP), ka votuar kandidati për kryeministër nga partia Lëvizja Vetëvendosje, Albin Kurti, raporton Anadolu.

Kandidati për kryeministër, njëherësh kryeministër në detyrë, Kurti, në fjalën e tij para mediave pas votimit, u bëri thirrje gjithë qytetarëve që ta ushtrojnë të drejtën e votës.

Kurti tha se qytetarët duhet të votojnë për t’u përcaktuar për përbërjen e Kuvendit të ardhshëm.

“Uroj e besoj dhe punojmë që Legjislatura e Dhjetë të konstituojë sa më shpejtë Kuvendin e ardhshëm dhe njëkohësisht ta formojë qeverinë e re”, tha Kurti.

Kurti shprehu shpresën se pjesëmarrja e qytetarëve në zgjedhje do të jetë masive për shkak se pjesëmarrja masive reflektohet në cilësinë e zgjedhjes dhe legjitimitetin e institucioneve.

Ai u pyet edhe për çështjen e koalicioneve, por tha se për shkak që partitë e tjera nuk pranuan koalicione pas zgjedhjeve të rregullta të 9 shkurtit 2025, sot vendi është në zgjedhje të jashtëzakonshme.

Kurti në procesin e votimit u shoqërua nga bashkëshortja e tij.