Shtyhet seanca gjyqësore ndaj kryebashkiakut Veliaj

Gjykata e Posaçme e Apelit për Korrupsionin dhe Krimin e Organizuar e Shqipërisë (GJPAKKO) ka shtyrë për nesër seancën për çështjen ndaj kryetarit të Bashkisë së Tiranës, Erion Veliaj, raporton Anadolu.

Veliaj ndodhet në paraburgim, i dyshuar për korrupsion dhe pastrim parash.

GJPAKKO-ja konfirmoi për Anadolu se seanca është shtyrë për më 12 mars, pasi sipas gjykatës avokatët e Veliajt do të njihen me provat e reja të paraqitur në seancën e sotme.

Seanca e sotme në apel ka zgjatur disa orë, ku avokatët e Veliajt kanë paraqitur pretendimet e tyre.

Veliaj kundërshton masën arrest në burg që u la në fuqi më 13 shkurt nga Gjykata e Posaçme e Shkallës së Parë për Korrupsionin dhe Krimin e Organizuar (GJKKO).

- Arrestimi i kryebashkiakut Veliaj

Veliaj është arrestuar më 10 shkurt, i dyshuar sipas autoriteteve për korrupsion dhe pastrim parash.

Ndërkohë, ndaj bashkëshortes së Veliajt, Ajola Xoxa, është vendosur masa “ndalim i daljes jashtë shtetit” dhe “detyrim për t’u paraqitur në policinë gjyqësore”, e dyshuar për disa vepra penale.

Veliaj është kryetar i Bashkisë së Tiranës që prej vitit 2015, ndërkohë ka mbajtur post edhe në Qeverinë e Shqipërisë, si dhe ka qenë edhe deputet.