Shkollat e Fondacionit Turk Maarif në Shqipëri kanë organizuar maratonën "Rikthim në shkollë", me rastin e fillimit të vitit të ri shkollor që u hap disa ditë më parë, raporton Anadolu.

Pjesë e maratonës prej 3 kilometrash ishin nxënës të shkollave të Fondacionit Maarif në Shqipëri, ndërkohë u organizua në Parkun e Madh të Liqenit Artificial të Tiranës, me qëllim që të motivojë të rinjtë për një fillim të mbarë të vitit shkollor.

I pranishëm gjatë aktivitetit ishte edhe Ambasadorit turk në Tiranë, Tayyar Kağan Atay, i cili gjatë fjalës së tij uroi nxënësit dhe stafin e institucioneve arsimore të fondacionit për fillimin e vitit të ri shkollor.

Ambasadori Atay e konsideroi maratonën në fjalë si një ide shumë të mirë për të filluar vitin shkollor 2025-2026.

"Sot ishte një ditë e ngrohtë, një ditë e bukur në Tiranë, e shkëlqyer dhe në këtë temperaturë keni guximin të vraponi rreth liqenit artificial dhe të përfundoni ngjarjen tuaj sot. Si ambasador, jam i privilegjuar që jam pjesë e kësaj dhe mendoj se kjo është bërë tashmë një traditë", tha ambasadori turk.

Atay shtoi se familja Maarif po rritet çdo vit, duke shtuar se maratona ndihmon imazhin e shkollave Maarif të bëhet gjithnjë e më i dukshëm në opinionin publik të Shqipërisë.

Të pranishëm ishin edhe drejtori i Zyrës së Fondacionit Turk Maarif në Shqipëri, Mesut Özbaysar, përfaqësues të tjerë të institucioneve turke në Shqipëri, mësues të Shkollave Maarif në Shqipëri dhe të ftuar të tjerë, ndërkohë u ndanë edhe disa çmime.

Sipas organizatorëve, qëllimi i maratonës është për të ndërtuar punë ekipore, motivim dhe për të filluar vitin e ri shkollor me objektiva të qarta. Viti i ri shkollor në Shqipëri filloi më 8 shtator në institucionet publike dhe private të arsimit parauniversitar, përfshirë edhe në shkollat e Fondacionit Turk Maarif.

Fondacioni Turk Maarif, përveç Universitetit të New Yorkut në Tiranë, administron edhe disa institucione arsimore në sistemin parauniversitar në Shqipëri, si në Tiranë, Elbasan dhe Shkodër.