Shqipëri, emërohet ministri i Shtetit për Rindërtimin
Me propozim të kryeministrit të Shqipërisë, Edi Rama, sipas dekretit të publikuar nga zyra e shtypit e Presidencës së Shqipërisë, Arben Ahmetaj është emëruar nga presidenti Meta në postin e ministrit të Shtetit për Rindërtimin
Tiranë
Pas tërmetit që shkaktoi vdekjen e dhjetëra personave, plagosjen e qindrave të tjerëve dhe dëme të konsiderueshme materiale, pjesë e kabinetit qeveritar të Shqipërisë është bërë edhe një ministër Shteti për Rindërtimin, transmeton Anadolu Agency (AA).
Me propozim të kryeministrit të Shqipërisë, Edi Rama, sipas dekretit të publikuar nga zyra e shtypit e Presidencës së Shqipërisë, Arben Ahmetaj është emëruar nga presidenti Meta në postin e ministrit të Shtetit për Rindërtimin.
Ahmetaj ka mbajtur më parë në qeveritë e drejtuar nga kryeministri Rama postin e ministrit të Financave.
Në fokus të punës së Ahmetajt pritet të jetë koordinimi me institucionet vendase dhe ndërkombëtare që do të angazhohen në procesin e rindërtimit të banesave që u shkatërruan apo dëmtuan gjatë tërmetit që goditi Shqipërinë në nëntor.
Ndërkohë, nga ana tjetër në rrjetet sociale kryeministri Rama ka shkruar se “Është një lajm i shumëdëshiruar marrja mbrëmë e vendimit të Këshillit Evropian për mbajtjen e konferencës së donatorëve në Tiranë, në fund të muajit janar, fillim të muajit shkurt, me qëllim mbështetjen e programit të rindërtimit nga të gjitha shtetet anëtare të BE-së".
Tërmeti i fuqishëm që goditi Shqipërinë më 26 nëntor, përveçse shkaktoi 51 persona të vdekur dhe qindra të plagosur, shkaktoi edhe dëme të konsiderueshme materiale.
Si pasojë e tërmetit janë shkatërruar dhe dëmtuar pallate, shtëpi, monumente kulturore, shkolla, objekte të institucioneve.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
