Nënkryetari i Organizatës së Veteranëve të Ushtrisë Çlirimtare të Kosovës (OVL-UÇK), Gazmend Syla, ka konfirmuar se autoritetet serbe kanë arrestuar sot një ish-pjesëtar të UÇK-së, transmeton Anadolu.

Syla në një përgjigje për mediat në Kosovë ka bërë të ditur se i arrestuari është Avni Qenaj nga fshati Romajë i Prizrenit, i cili gjatë luftës ka shërbyer në Brigadën 138 “Agim Ramadani” në Koshare.

“Ai është arrestuar dhe sipas informacioneve që kemi, me gjasë ia kanë gjetur kartelën e anëtarësisë së veteranit që e kemi lëshuar ne, gjatë kontrollit. Ndërkaq, sipas të dhënave tona, Qenaj kishte kaluar dy a tri herë më herët nëpër Serbi dhe nuk kishte pasur probleme”, tha Syla.

Ndërkohë, Ministria e Brendshme e Serbisë më herët njoftoi se ka arrestuar një shtetas të Kosovës, të identifikuar me inicialet A.Q. (1973), i cili dyshohet për “organizim të një grupi dhe nxitje për kryerjen e gjenocidit dhe krimeve të luftës” gjatë viteve 1998-1999.

Në njoftim thuhet se i dyshuari “në prill të vitit 1998 iu bashkua selisë lokale të të ashtuquajturës UÇK për fshatin Romajë” dhe se më pas, si pjesë e Brigadës 138 “Agim Ramadani”, ka marrë pjesë në sulmin ndaj postbllokut kufitar serb në Koshare në vitin 1999.

Ministria serbe bëri të ditur se ndaj tij është caktuar masa e ndalimit prej 48 orësh dhe se do të paraqitet me kallëzim penal në prokurorinë kompetente për krime lufte.

Institucionet në Kosovë ende nuk kanë bërë ndonjë reagim lidhur me arrestimin.