Gjykata Themelore në Prishtinë edhe në rigjykim e ka shpallur fajtor dhe e ka dënuar me 13 vjet burgim Dushko Arsiqin, të akuzuar për krime lufte në Kosovë, transmeton Anadolu.

Aktgjykimi u shpall nga trupi gjykues i kryesuar nga Vesel Ismaili. Gjykata bëri të ditur se të akuzuarit do t’i llogaritet koha e kaluar në paraburgim, ndërsa masa e paraburgimit i vazhdohet deri në plotfuqishmërinë e vendimit.

Arsiqi u obligua gjithashtu të paguajë shpenzimet e procedurës, përkatësisht 200 euro paushall gjyqësor dhe 100 euro për Fondin për Kompensimin e Viktimave të Krimit,

Rasti ishte kthyer në rigjykim nga Gjykata e Apelit, megjithëse Arsiqi ishte dënuar me të njëjtën masë edhe në shkurt të vitit 2024.

Sipas aktakuzës së Prokurorisë Speciale, Arsiqi akuzohet se gjatë periudhës janar-qershor të vitit 1999, në bashkëkryerje me forca serbe, ka marrë pjesë në dëbime të civilëve, plaçkitje, djegie pronash, si dhe në keqtrajtim dhe vrasje të civilëve shqiptarë.