Prishtinë, zjarri kaploi një pjesë të ndërtesës së Institutit të Mjekësisë Ligjore

Një pjesë e ndërtesës së Institutit të Mjekësisë Ligjore në Prishtinë është kapluar nga një zjarr i madh mëngjesin e së martës, transmeton Anadolu.

Ministria e Drejtësisë, njoftoi se zjarri filloi rreth orës 8 të mëngjesit duke përfshirë disa nga zyrat e katit të dytë të objektit i cili gjendet në Qendrën Klinike Universitare të Kosovës (QKUK).

"Zjarri është lokalizuar dhe për momentin nuk dihen shkaqet. Menjëherë pas pranimit të informacionit, ekipet e zjarrfikësve dhe policisë kanë shkuar në vend të ngjarjes", njoftoi ministria.

Gjithashtu bëhet e ditur se në terren doli edhe zëvendësministri i Drejtësisë, Blerim Sallahu, për të kuptuar më shumë rreth situatës së krijuar.

Nuk dihen ende shkaqet e djegies së këtyre zyrave, ndërsa nga zjarrfikësit u bë e ditur se nuk kishte të lënduar nga ky zjarr, por dëme materiale përfshirë dokumente të këtyre zyrave.