SHKUP (AA) – Prezantuesja e njohur televizive serbe, Ana Mihajlovski, ka publikuar një video ironike duke prezantuar gjoja një grim në një sfond me pamje nga sulmet izraelite në Gaza, në atë që duket një akt i fuqishëm proteste ndaj indiferencës globale përballë katastrofës humanitare në Gaza, transmeton Anadolu.

Në videon që postoi në Instagram, ajo fillimisht shfaqet duke promovuar një maskarë: “Dje më erdhi kjo maskara. Shikoni sa bukur i bën qerpikët, sa të shëndetshëm duken…” Megjithatë, në sfond shfaqen pamje tronditëse nga Gaza.

Në përshkrimin e postimit ajo sqaron se nuk ka për qëllim të kritikojë askënd në veçanti, por të tërheqë vëmendjen ndaj krizave humanitare dhe luftërave që po zhvillohen nëpër botë, ndërsa si titull i përshkrimit ka shkruar: “Rrjetet sociale 2025”.

Sipas mediave lokale, në video janë përfshirë pamje nga shkatërrimet në Gaza dhe Bejrut, ndërsa mesazhi i saj është i qartë: “Ndërsa njerëzit në botë po vdesin, disa janë të fokusuar vetëm te fitimet përmes rrjeteve sociale”.

Shumë përdorues të rrjeteve sociale e kanë mbështetur videon e prezantueses serbe.