Në kuadër të vizitës zyrtare në Kroaci, presidentja e Maqedonisë së Veriut, Gordana Siljanovska-Davkova, është pritur në takim nga kryeministri kroat, Andrej Plenkoviq, transmeton Anadolu.

Siç njofton kabineti i presidentes Siljanovska-Davkova, në takim u shpreh kënaqësi për marrëdhëniet e shkëlqyera bilaterale të bazuara në respekt dhe besim të ndërsjellë, dialog intensiv politik dhe bashkëpunim konstruktiv në fushat me interes të përbashkët.

Siljanovska-Davkova theksoi se një impuls i ri në bashkëpunim, por edhe dëshmi e miqësisë së sinqertë, është iniciativa e qeverisë maqedonase për lidhjen e një marrëveshjeje për bashkëpunim strategjik me qeverinë e Kroacisë.

Siljanovska-Davkova shprehu mirënjohje për mbështetjen e fortë dhe të vazhdueshme kroate për procesin eurointegrues të Maqedonisë së Veriut.

Ajo gjithashtu përshëndeti qëndrimin e Kroacisë për nevojën e zgjerimit të shpejtë të Bashkimit Evropian (BE) me vendet e Ballkanit Perëndimor, në bazë të meritave reale në përmbushjen e kritereve të Kopenhagës.

Presidentja Siljanovska-Davkova qëndron për vizitë në Kroaci, ku më herët u prit në takim edhe nga homologu i saj kroat, Zoran Milanoviq.