Ministri i Jashtëm i Turqisë, Hakan Fidan, nesër në Stamboll do të jetë nikoqir i takimit të parë të Platformës së Paqes së Ballkanit, e krijuar nën udhëheqjen e Turqisë dhe me pjesëmarrjen e disa vendeve të Ballkanit, transmeton Anadolu.

Sipas informacioneve të siguruara nga burime të Ministrisë së Jashtme, në takim pritet të marrin pjesë ministrat e Jashtëm të Kosovës, Maqedonisë së Veriut, Bosnjë dhe Hercegovinës, Malit të Zi dhe Serbisë, ndërsa pritet të marrë pjesë edhe zëvendësministri i Jashtëm i Shqipërisë.

Platforma synon të rrisë dialogun, besimin e ndërsjellë dhe bashkëpunimin midis vendeve të rajonit dhe të prodhojë zgjidhje të qëndrueshme për çështjet rajonale.

Në takim, i cili do të mbahet në një format konsultimi joformal, ministri Fidan pritet të theksojë rëndësinë e veprimit me një qasje të bazuar në parimin e mbështetjes rajonale. Ai pritet të zhvillojë konsultime për forcimin e integrimit rajonal, ruajtjen e stabilitetit dhe eliminimin e rreziqeve ekzistuese të sigurisë, si dhe të diskutojë projekte konkrete bashkëpunimi në fushat e lidhshmërisë, veçanërisht korridoret e transportit, si dhe në ato të energjisë dhe komunikimit.

Fidan pritet gjithashtu ta theksojë rolin e Platformës së Paqes së Ballkanit si plotësuese dhe jo alternativë e platformave dhe nismave të tjera ekzistuese, dhe të deklarojë se Turqia i jep përparësi të gjitha nismave konstruktive që do të kontribuojnë në paqen rajonale, dialogun dhe prosperitetin e përbashkët.

Ministri Fidan është planifikuar gjithashtu të zhvillojë takime dypalëshe në margjinat e takimit.

- Angazhimi shumëpalësh i Turqisë në Ballkan

Platforma e Paqes e Ballkanit shquhet si një nismë e zhvilluar brenda qasjes inovative të Turqisë ndaj diplomacisë, që synon të adresojë nevojat e rajonit.

Turqia i jep përparësi udhëheqjes dhe pjesëmarrjes aktive në platformat dhe nismat shumëpalëshe në Ballkan.

Në këtë kontekst, nën udhëheqjen e Turqisë janë krijuar Mekanizmat Konsultativë Trepalësh Turqi-Bosnjë e Hercegovinë-Serbi dhe Turqi-Bosnjë e Hercegovinë-Kroaci.

Turqia merr pjesë rregullisht në struktura të tilla si Procesi i Bashkëpunimit të Evropës Juglindore, Këshilli i Bashkëpunimit Rajonal dhe Komiteti Drejtues i Këshillit të Zbatimit të Paqes në Bosnjë dhe Hercegovinë.

Turqia gjithashtu kontribuon në stabilitetin rajonal përmes pranisë së saj në Kosovë si pjesë e Forcës së NATO-s KFOR dhe në Bosnjë dhe Hercegovinë si pjesë e operacionit “EUFOR Althea”.