Ministri i Jashtëm rus, Sergey Lavrov, deklaroi se Organizata për Siguri dhe Bashkëpunim në Evropë (OSBE) është në një “situatë të mjerueshme” dhe e ardhmja e saj është e pasigurt, duke shtuar se kjo organizatë është “në buzë të humnerës”, raporton Anadolu.

Lavrov foli në takimin e Këshillit të 30-të Ministerial të OSBE-së në Shkup, kryeqytetin e Maqedonisë së Veriut.

Duke reaguar ndaj sanksioneve të Perëndimit ndaj ekonomisë ruse, Lavrov tha: “Shtetet e Bashkuara dhe satelitët e saj evropianë kanë vendosur mijëra sanksione ndaj Rusisë me qëllim të kolapsit të ekonomisë ruse, duke i dhënë fund kështu bashkëpunimit të gjerë praktik midis Lindjes dhe Perëndimit në rajonin tonë, ku dikur ishim partnerë”, tha ai.

Duke deklaruar se Bashkimi Evropian (BE) ka mbajtur peshën kryesore të pasojave të aventurës së SHBA-së në Ukrainë dhe ka braktisur format e partneritetit ekonomik që i kishin siguruar prosperitetin për dekada, Lavrov theksoi se BE-ja luajti me përkushtim rolin që i ishte caktuar.

Lavrov deklaroi se BE-ja ka braktisur synimet e saj për rritjen e mirëqenies së vendeve anëtare dhe “të jep përshtypjen se është kthyer në një projekt gjeopolitik agresiv”, kryesisht për shkak të përpjekjeve të burokracisë së Brukselit.

“OSBE-ja në situatë të mjerueshme”

Duke kritikuar OSBE-në, Lavrov tha: “Për më shumë se një vit, Akti Final i Helsinkit do të festojë 50-vjetorin e tij. Në këtë kontekst, me keqardhje deklaroj se OSBE-ja po hyn në 50-vjetorin e miratimit të Aktit Final të Helsinkit në një situatë të mjerueshme dhe e ardhmja e saj është e pasigurt”.

Duke thënë se Rusia po bën çdo përpjekje për të krijuar një zonë të përbashkët sigurie të bazuar në bashkëpunimin në Evropë, Lavrov u shpreh: “Për fat të keq, elitat politike perëndimore, të cilat kanë përvetësuar të drejtën për të përcaktuar fatin e njerëzimit, kanë bërë një zgjedhje të pakujdesshme në favor të NATO-s, jo në favor të OSBE-së”.

Ai theksoi se NATO po zgjerohet drejt lindjes dhe shtoi se vendet anëtare të NATO-s me duart e tyre shkatërruan dimensionin ushtarak dhe politik të OSBE-së.

Siç tha ai, kryeqendrat perëndimore shkatërruan mundësinë e rigjallërimit të OSBE-së dhe se këto qarqe kanë formuar një komunitet politik evropian pa Rusinë dhe Bjellorusinë.

“Le ta pranojmë, OSBE-ja është në buzë të humnerës”, tha ai.

Lavrov për herë të parë në Evropë që nga fillimi i luftës

Ministri i Jashtëm rus Lavrov udhëtoi për herë të parë në një vend në Evropë pas fillimit të luftës Rusi-Ukrainë dhe mori pjesë për herë të parë në një takim të OSBE-së.

Pjesëmarrja e Lavrovit në takimin e mbajtur në Lodz të Polonisë, më 1-2 dhjetor 2022, gjatë presidencës me OSBE-në, ishte refuzuar.

Që nga fillimi i luftës, vendet evropiane kanë mbyllur hapësirën e tyre ajrore për shkak të sanksioneve kundër Rusisë. Ndërkaq, siç është njoftuar më herët, nuk ka pasur asnjë pengesë që Lavrov të marrë pjesë në takimin në Maqedoninë e Veriut.

Avioni me ministrin e Jashtëm rus Lavrov dhe delegacionin e tij mbërriti në Maqedoninë e Veriut përmes Greqisë për shkak se Bullgaria nuk dha leje fluturimi, me arsyetimin se në bord gjendej zëdhënësja e Ministrisë së Jashtme ruse, Mariya Zakharova.