Kuvendi i Shqipërisë miraton ngritjen e komisioneve të posaçme për reformën zgjedhore dhe atë territoriale

Kuvendi i Shqipërisë ka miratuar ngritjen e komisioneve parlamentare për reformën zgjedhore dhe reformën territoriale, raporton Anadolu.

Në seancën e sotme parlamentare, u miratua projektvendimi "Për ngritjen e Komisionit të Posaçëm Parlamentar për Realizimin e Reformës Zgjedhore" dhe Projektvendimi "Për ngritjen e Komisionit të Posaçëm Parlamentar për Reformën Administrativo-Territoriale në Republikën e Shqipërisë".

Sipas Kuvendit të Shqipërisë, komisioni i posaçëm për reformën zgjedhore ka objekt të veprimtarisë së tij hartimin e ndryshimeve legjislative për reformën zgjedhore, trajtimin e rekomandimeve në raportet e OSBE/ODIHR-it për zgjedhjet vendore të 14 majit 2023 dhe për zgjedhjet parlamentare të 11 majit 2025.

Gjithashtu komisioni ka si objekt trajtimin e rekomandimeve të institucioneve përgjegjëse për zgjedhjet, të partive politike parlamentare dhe organizatave jofitimprurëse dhe hartimin e një ligji për financimin e partive politike.

Nga ana tjetër, komisioni i posaçëm për reformën territoriale, sipas Kuvendit, ka për objekt të veprimtarisë së tij shqyrtimin e kuadrit ligjor dhe institucional të qeverisjes vendore, analizimin dhe propozimin e opsioneve për ridizenjimin territorial dhe forcimin e kapaciteteve administrative të njësive të qeverisjes vendore.

Gjithashtu komisioni ka si objekt analizimin e sistemit aktual të financave vendore dhe rekomandimin e masave për shëndoshjen financiare dhe rritjen e qëndrueshmërisë së njësive të vetëqeverisjes vendore, shqyrtimin e cilësisë dhe aksesit të shërbimeve publike vendore dhe sigurimin e përputhshmërisë së propozimeve me "acquis" të Bashkimit Evropian (BE) dhe politikat e kohezionit rajonal.

Pas përgatitjeve të drafteve përkatëse, Kuvendi do të miratojë ndryshime ligjore në Kodin Zgjedhor dhe pritet të krijojë një hartë të re të ndarjes administrative të vendit.