Kuvendi i Shqipërisë është mbledhur në seancë plenare, ndërkohë seanca është shoqëruar me debate mes deputetëve të shumicës parlamentare dhe opozitës, raporton Anadolu.

Në rendin e ditës të seancës së sotme ishte miratimi i procesverbalit për seancën e kaluar, ndërkohë seanca u përfshi nga diskutimet dhe debatet për çështje të ndryshme.

Deputetët e partisë opozitare, Partisë Demokratike (PD), kërkuan që Kuvendi të vë në dispozicion të tyre rregulloren e re të Kuvendit, ndryshime të cilat u miratuan disa ditë më parë.

Kryetari i Kuvendit të Shqipërisë, Niko Peleshi, u shpreh se është e drejta e çdo deputeti të ketë aktet dhe materiale.

“Rregullorja e re, më konfirmojnë shërbimet e Kuvendit, u është shpërndarë të gjithë deputetëve”, u shpreh Peleshi.

Seancat e fundit të Kuvendit të Shqipërisë janë përfshirë nga debatet.

Grupi parlamentar i PD-së ka kërkuar një mocion me debat për sa i përket diskutimeve për programin e qeverisë së re.

Në mes të debateve, deputetët e PD-së u larguan nga seanca plenare, duke mos marrë pjesë në votim.

Në seancën e sotme u miratua programi dhe kalendari i punimeve të Kuvendit të Shqipërisë për periudhën 29 shtator-17 tetor.

Kujtojmë se më 18 shtator Kuvendi i Shqipërisë miratoi programin e qeverisë së re dhe përbërjen e saj, seancë e cila vazhdon të kundërshtohet nga deputetët e opozitës.