Kryeministri i Kosovës, Albin Kurti, është takuar në margjina të Forumit Ekonomik Botëror në Davos me kryeministrin e Lituanisë, Gintautas Paluckas, transmeton Anadolu.

Siç njofton Zyra e Kryeministrit, Kurti uroi fillimisht homologun lituanez për fitoren në zgjedhjet e fundit dhe shprehu falënderim ndaj shtetit mik të Lituanisë për mbështetjen ndaj Kosovës, veçanërisht në fushën e sigurisë, përmes kontributit në misionin e KFOR-it dhe EULEX-it, bashkë edhe me përkrahjen e Kosovës në aspiratat për anëtarësim në organizatat ndërkombëtare.

Kryeministri Kurti dhe kryeministri Paluckas diskutuan edhe mbi gjeopolitikën dhe situatën e sigurisë në rajon dhe Evropë dhe adresimin e sfidave të përbashkëta.

Me këtë rast, kryeministri Kurti shprehu dënimin e agresionit rus ndaj Ukrainës dhe theksoi që Republika e Kosovës është rreshtuar me partnerët ndërkombëtarë në vendosjen e sanksioneve ndaj Rusisë.

Kurti e falënderoi homologun Paluckas për takimin dhe bisedën në shërbim të thellimit e fuqizimit të mëtejmë të marrëdhënieve dhe bashkëpunimit dypalësh.