Ministri i Punëve të Jashtme dhe i Tregtisë së Jashtme i Maqedonisë së Veriut, Timço Mucunski, priti sot në New York takimin e ministrave të jashtëm të Iniciativës Adriatiko-Joniane, në kuadër të sesionit të 80-të të Asamblesë së Përgjithshme të Kombeve të Bashkuara, transmeton Anadolu.

Mucunski, në një postim në platformën amerikane të medias sociale X, vuri në dukje se takimi u mbajt nën moton “Forcimi i unitetit rajonal, avancimi i së ardhmes evropiane”.

“U konfirmua angazhimi ynë i përbashkët për bashkëpunim rajonal dhe multilateralizëm konstruktiv”, shkroi Mucunski me rastin e takimit.

Ai theksoi se është konfirmuar edhe angazhimi për avancimin e integrimit në Bashkimin Evropian (BE) dhe thellimin e lidhjeve me Unionin, duke shtuar:

“Është theksuar rëndësia e një procesi të besueshëm të zgjerimit të BE-së me Ballkanin Perëndimor në thelbin e tij”.