Ministri i Jashtëm i Bosnjë e Hercegovinës (BeH), Elmedin Konakoviq tha sot se Organizata për Siguri dhe Bashkëpunim në Evropë (OSBE) ndodhet në një udhëkryq vendimtar, ku lufta në Ukrainë, kërcënimet hibride dhe erozioni i besimit vazhdojnë të kërcënojnë paqen dhe sigurinë bashkëpunuese në të gjithë rajonin, transmeton Anadolu.

Konakoviq iu drejtua Këshillit të 32-të Ministror të OSBE-së në Vjenë, duke theksuar se "Bosnjë e Hercegovina ndoshta i kupton vuajtjet e Ukrainës më shumë se shumica dhe për këtë arsye beson fuqimisht se paqja, drejtësia dhe respekti për të drejtën ndërkombëtare janë e vetmja rrugë përpara".

Ai konfirmoi se ruajtja e paqes në BeH mbetet përgjegjësi e përbashkët dhe se mbështetja e shtuar për forcat pro-evropiane është thelbësore sepse rruga euroatlantike e BeH-së po bëhet "më e rëndësishme se kurrë", njoftoi Ministria e Punëve të Jashtme e BeH-së në rrjetin social të kompanisë X me seli në SHBA.

Konakoviq bëri thirrje për forcimin e institucioneve dhe pranisë në terren të OSBE-së, miratimin pa vonesë të një buxheti të unifikuar, angazhim të ripërtërirë ndaj dialogut si një mjet kyç i diplomacisë dhe adresimin e kërcënimeve të reja si rreziqet kibernetike, inteligjenca artificiale dhe dezinformimi.

"Bosnjë e Hercegovina mbetet e përkushtuar fuqimisht ndaj paqes, stabilitetit dhe rendit ndërkombëtar të bazuar në rregulla, duke punuar së bashku me partnerët tanë për një të ardhme më të sigurt dhe më elastike", tha Ministria e Jashtme e BeH-së.