Situata pas reshjeve të dendura të shiut ditëve të fundit që shkaktoi vërshime në disa pjesë të Kosovës në disa zona po shkon duke u përmirësuar ndërsa në disa mbetet ende e rëndë, raporton Anadolu.

Komuna e Malishevës, e cila shpalli gjendje emergjente para dy ditësh, ka bërë të ditur se nuk janë evidentuar probleme të reja ndërsa niveli i ujërave ka shënuar rënie dhe situata është në drejtim të stabilizimit të plotë. Edhe në Drenas si një nga komunat më të prekura të pjesës qendrore të Kosovës, gjendja ishte e qetë në 24 orët e fundit dhe rrugët ishin më të qarkullueshme.

Pak kilometra më larg Drenasit, gjendja ka qenë me më shumë potencial për rreziqe të reja në Komunën e Skenderajt. Kryetari i kësaj komune, Sami Lushtaku tha gjatë orëve të mbrëmjes të së mërkurës se po e përcjellin vazhdimisht gjendjen në shtratin e lumit Klina, për të parë nga afër dhe për të monitoruar nivelin e ujit.

"Bashkë me ekipet përgjegjëse komunale, me policinë dhe zjarrfikësit po i ndjekim zhvillimet nga afër, me prioritet sigurinë e qytetarëve dhe marrjen e masave të nevojshme varësisht nga situata", shkroi Lushtaku.

Në rajonin e Prizrenit, ku po ashtu ka pasur dëme materiale në ekonomitë familjare të disa fshatrave të zonës së Hasit, situata është nën kontroll.

Kryetari i Komunës së Prizrenit, Shaqir Totaj ka thënë se gjendja po monitorohet vazhdimisht dhe intervenimet po realizohen në kohë reale. "Puna po vazhdon me intensitet të lartë deri në stabilizimin e plotë të situatës, derisa Komuna e Prizrenit i fton qytetarët të qëndrojnë të qetë pasi institucionet janë në krye të detyrës dhe në shërbim të qytetarëve", shkroi Totaj.

Gjatë ditës së djeshme presidentja Vjosa Osmani e vizitoi Komunën e Malishevës dhe atë të Gjakovës pas vërshimeve në këto vende, ku është takuar me kryetarët e këtyre dy komunave, Ardian Gjinin dhe Ekrem Kastratin si dhe disa nga familjet e prekura.

"Këto situata na kujtojnë sa i rëndësishëm është solidariteti dhe bashkëpunimi kur qytetarët përballen me vështirësi sikurse kjo", shkroi Osmani duke falënderuar ekipet e emergjencës si ato lokale dhe qendrore, Agjencinë për Menaxhimin e Emergjencave, zjarrfikësit dhe policinë, të cilët ishin në krye të detyrës, duke mbrojtur jetët dhe pronat e qytetarëve.

Ajo rikujtoi se Forcat e Sigurisë së Kosovës (FSK) janë gjithmonë në gatishmëri për t'u ardhur në ndihmë qytetarëve në raste emergjente.