Kosovë, hapet edicioni i 15-të i Festivalit Ndërkombëtar të Filmit "PriFest"

Edicioni i 15-të i Festivalit Ndërkombëtar të Filmit “PriFest” është hapur sonte me premierën e filmit kosovar “Toka brenda nesh” me regji nga Fisnik Maxville, raporton Anadolu.

Filmdashës të shumtë janë pritur me tapet të kuq para kinemasë “Armata”, ku gjatë shtatë ditëve do të shfaqen 21 filma, të cilët do të kenë premierën e tyre kosovare.

Drejtori i festivalit “PriFest”, Fatos Berisha, tha se tradicionalisht kategoria kryesore është “Filmi ballkanik”, ku këtë vit konkurrojnë pesë filma.

“Filmat ballkanikë janë kategoria jonë kryesore, filmat artistikë, ndërsa po e hapim me një film kosovar. Vazhdojmë me filmin nga Mali i Zi ‘Sirin’, i cili sapo pati premierën botërore në Festivalin e Filmit në Sarajevë dhe më pas me filmin bullgar ‘Blaga’s Lessons’, një film i jashtëzakonshëm që pati premierën e tij në Festivalin e Berlinit. Më pas vjen filmi kroat ‘Escord’ i regjisorit Nola, i cili së fundmi u nda nga jeta dhe përfundojmë me filmin nga Shqipëria ‘Një filxhan kafe’ ”, tha Berisha për Anadolu.

Berisha theksoi se vitin e kaluar në fokus të festivalit ishte Ukraina, ndërsa këtë vit do të jetë shteti i Izraelit pasi këtë vit Kosova dhe Izraeli nënshkruan një marrëveshje dypalëshe për bashkëprodhim filmik. Ai shtoi se në festival do të marrin pjesë një numër i madh nga kinematografia izraelite, do të shfaqen filma izraelitë dhe do të mbahen punëtori.

Në festival do të shfaqen filma me metrazh të shkurtër dhe të mesëm, si dhe shfaqje speciale, së bashku me panel diskutime për filmat e shfaqur dhe punën e kinemasë.

“PriFest” përfundon të dielën më 17 shtator me shpalljen e fituesve. “PriFest” mbështetet nga Qendra Kinematografike e Kosovës, me mbështetjen e industrisë vendore të filmit.