Forca e Sigurisë së Kosovës (FSK) pritet që së shpejti të pajiset me armatim antitank "Panzerfaust 3" nga Gjermania, ka konfirmuar ministri në detyrë i Mbrojtjes, Ejup Maqedonci, për mediat lokale, transmeton Anadolu.

Ai ka thënë se ato tashmë janë blerë dhe së shpejti do të arrijnë në Kosovë.

"Po, janë blerë tashmë dhe mbetet që së shpejti të transportohen te ne", ka thënë shkurt Maqedonci.

"Panzerfaust 3" është një armë antitank portativ, i projektuar për t'u përdorur nga një ushtar i vetëm, e prodhuar në Gjermani nga kompania "Dynamit Nobel Defence".

Kjo armë përdoret për shkatërrimin e tankeve, automjeteve të blinduara dhe objektivave të fortifikuara ndërsa konsiderohet si një nga sistemet më të fuqishme të antitankëve në përdorim.