Kosova ngre dyshime se gjyqtari Llaban është bashkëpunëtor i BIA-s serbe
Sipas Haxhiut, Llaban ishte arrestuar sa ishte zyrtar për inteligjencë në Doganën e Serbisë më 2006 dhe se ishte dënuar me gjashtë vjet heqje lirie.
Prishtinë
Institucionet kosovare kanë ngritur dyshime se gjyqtari i etnisë serbe në Gjykatën Kushtetuese të Kosovës, Radomir Llaban, është “bashkëpunëtor i Agjencisë për Siguri dhe Informim të Serbisë – BIA”, transmeton Anadolu.
Në një konferencë për media nga Qeveria e Kosovës, ministrja në detyrë e Drejtësisë, Albulena Haxhiu, tha se dyshimet bazohen në informacionet që ajo ka nga institucionet e sigurisë së Kosovës.
Sipas Haxhiut, Llaban ishte arrestuar sa ishte zyrtar për inteligjencë në Doganën e Serbisë më 2006 dhe se ishte dënuar me gjashtë vjet heqje lirie.
“Ky rast besohet të jetë momenti kur BIA e komprometoi dhe ia organizoi zhvendosjen në Kosovë... si u lirua mbetet enigmatike, por Serbia e ka ende aktive arrestin ndaj tij. Enigmë mbetet edhe emërimi i tij por edhe qëndrimi në pozitën e gjyqtarit”, ka thënë ajo.
Po ashtu, ministrja kosovare në detyrë tha se Llaban ka “raporte shumë të afërta me kryeterroristin, Millan Radoiçiq”, ish-nënkryetarin e Listës Serbe, i cili e mori përgjegjësinë për sulmin e një grupi serbësh të armatosur ndaj Policisë së Kosovës në Banjskë të Zveçanit.
“Me mjetet financiare dhe pasurinë e patundshme që merr edhe sot nga Serbia, Llaban paraqet kërcënim për sigurinë dhe rendin kushtetues të Kosovës”, tha ajo.
Tutje, Haxhiu ka kritikuar zinxhirin e institucioneve për mosveprim në rastin e Llabanit, sidomos pas konferencës së presidentes Vjosa Osmani, derisa i ka bërë thirrje Prokurorisë që të nisë hetimet, apo nëse i ka nisur të tregojë publikisht për këtë.
Gjithashtu Haxhiu ka ftuar Gjykatën Kushtetuese të nisë procedurën për shkarkimin e Llabanit.
Presidentja Vjosa Osmani ditë më parë e tërhoqi kërkesën e saj drejtuar Gjykatës Kushtetuese lidhur me pasojat juridike pas dështimit të deputetëve për të konstituuar Kuvendin brenda 30 ditësh. Presidentja tha në një konferencë për media se këtë e bëri pasi Radomir Llaban u caktua gjyqtar raportues për këtë rast. Osmani bëri të ditur se Llaban ishte konsideruar si person i rrezikshëm për sigurinë kombëtare dhe rendin kushtetues, sipas raporteve të institucioneve të sigurisë të viteve 2018, 2021 dhe 2024.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
