Kosovë, mbyllet aeroporti "Adem Jashari" për shkak të kërcënimit me bombë

Për shkak të kanosjes me mjete shpërthyese është mbyllur përkohësisht aeroporti ndërkombëtar "Adem Jashari" në Prishtinë, transmeton Anadolu Agency (AA).

Siç njofton Policia e Kosovës, në orët e paradites ky institucion ka pranuar një informacion me përmbajtje kërcënuese, për mjete shpërthyese në aeroportin që gjendet në Sllatinë të Fushë Kosovës.

"Bazuar në këtë informacion, Policia e Kosovës në bashkëpunim dhe koordinim me institucionet relevante, ka ndërmarrë veprimet e menjëhershme policore, ku për shkaqe sigurie ka mbyllur përkohësisht aeroportin. Me qëllim të hetimit, kontrollit dhe masave të sigurisë, janë angazhuar njësitet relevante, andaj kërkojmë mirëkuptimin e të gjithë qytetarëve", bëhet e ditur nga Policia.

Policia e Kosovës ka theksuar se do të informojë opinionin publik lidhur me zhvillimet e mëtejme deri në hapjen e aeroportit për qarkullim.