Zëvendëskryeministri i Parë dhe ministri i Punëve të Jashtme dhe Diasporës i Kosovës, Glauk Konjufca ka deklaruar se Republika e Kosovës mbetet e përkushtuar që dialogun ta shohë si një mundësi për përmirësimin e marrëdhënieve fqinjësore me Serbinë, transmeton Anadolu.

Konjufca ka pritur në një takim përfaqësuesin special të Bashkimit Evropian (BE) për dialogun Kosovë-Serbi, Peter Sorensen.

Ministria e Punëve të Jashtme dhe Diasporës në rrjetet sociale ka bërë të ditur se në takimin njoftues u diskutua momenti aktual në të cilin ndodhet dialogu, si dhe u shkëmbyen pikëpamje mbi qasjen dhe parimet e nevojshme për të siguruar një proces më efektiv dhe të qëndrueshëm.

"Konjufca theksoi se Republika e Kosovës mbetet e përkushtuar që dialogun ta shohë si një mundësi për përmirësimin e marrëdhënieve fqinjësore me Serbinë, si dy shtete sovrane në rrugën e tyre drejt integrimit evropian", theksohet në njoftim.

Gjithashtu thuhet se Konjufca e informoi Sorensenin se procesi i dialogut tashmë do të jetë nën udhëheqjen e Ministrisë së Punëve të Jashtme dhe Diasporës.