Komuniteti bektashi në Trakinë Perëndimore kundër përpjekjeve për krijimin e "shtetit bektashi" në Shqipëri

KOMOTINI (AA) – Komunitetet turke alevi dhe bektashi në Trakinë Perëndimore kanë reaguar ndaj përpjekjeve në Shqipëri për të krijuar një strukturë shtetërore mbi bazën e besimit bektashian, transmeton Anadolu.

Kryetari i Shoqatës së Arsimit dhe Kulturës së Pakicës “Seçek”, Necmettin Kahya, në një takim të mbajtur në Komotini, lexoi një deklaratë ku theksoi se ky formim është në kundërshtim me parimet e besimit dhe i papranueshëm.

Në deklaratë iu bë referim deklaratave të muajve të fundit të kryeministrit shqiptar Edi Rama për “krijimin e një shteti bektashi në Tiranë nën udhëheqjen e Baba Mondit (Edmond Brahimaj)”. U theksua se kjo nismë është e papërshtatshme jo vetëm në bazë të besimit, por gjithashtu për paqen rajonale dhe strukturat multikulturore.

Duke nënvizuar se në traditën bektashiane nuk ka vend për struktura politike, në deklaratë u tha se vetëshpallja e Baba Mondit si “udhëheqës botëror i bektashinjve” është në kundërshtim me ritet dhe praktikën historike.

“Pas ndarjes nga jeta të Haxhi Dede Reshat Bardhit, në Shqipëri nuk është zbatuar as ceremonia e dekretimit të ‘halifebabasë’. Në këtë rast, edhe ‘dedebaballëku’ është i pavlefshëm”, thuhet në reagim.

Po ashtu, u rikujtua se qendra e bektashizmit ndodhet brenda kufijve të Turqisë, në Teqenë e Haxhi Bektash Veliut, dhe se “struktura hierarkike e ndërtuar prej shekujsh vazhdon pa ndërprerje edhe sot”. Për këtë arsye, pretendimi i Baba Mondit për udhëheqje dhe shtetformim është i papranueshëm, u tha në deklaratë.

Po ashtu u theksua se komunitetet alevi-bektashi në Shqipëri, Maqedoninë e Veriut, Bosnjë dhe Hercegovinë, Bullgari, Greqi dhe Turqi, si dhe në Ballkan në përgjithësi, kanë mes tyre vetëm një lidhje shpirtërore e zemre.