Në kuadër të Javës Çame, në kryeqytetin Shkup është organizuar "karvani me vetura të zbukuruara me simbole çame dhe kombëtare", një ndër aktivitetet e mbajtura për të përkujtuar 81-vjetorin e gjenocidit grek ndaj shqiptarëve të Çamërisë, raporton Anadolu.

Karvani filloi pas mesdite nga lagja Butel e Shkupit dhe përfundoi në Sheshin Skenderbeu.

Karvani i veturave është pjesë e disa aktiviteteve të mbajtura në kuadër të Javës Çame nën moton "Trëndafili i Çamërisë", bashkë-organizator i të cilës është Shoqata Kulturore "Vizioni M" - Shkup.

Nga qershori i vitit 1944 deri në mars të vitit 1945, mijëra shqiptarë të Çamërisë përjetuan një gjenocid të ashpër nga forcat greke nën komandën e Napoleon Zervës, që rezultoi me vdekjen masive të civilëve, por edhe me shkatërrimin, grabitjen dhe konfiskimin e pronave të tyre.