Punëtorët dhe nëpunësit civilë në Greqi kanë nisur një grevë të përgjithshme 24-orëshe kundër një rregulloreje të re ligjore mbi orarin e punës që qeveria po përgatitet të zbatojë, transmeton Anadolu.

Punëtorët dhe nëpunësit civilë po mbajnë një grevë 24-orëshe me kërkesë të Konfederatës së Sindikatave të Nëpunësve Civilë Grekë (ADEDY), Konfederatës së Sindikatave të Punëtorëve (GSEE) dhe Sindikatës së Punëtorëve (PAME) të lidhur me Partinë Komuniste të Greqisë (KKE).

Për shkak të grevës është ndalur transporti detar, ndërsa në kryeqytetin Athinë, automjetet e transportit publik kanë ndërmarrë veprim duke lënë punën dhe duke ofruar shërbim vetëm në orare të caktuara. Në kuadër të grevës punëtorët dhe nëpunësit civilë u mblodhën në qendër të Athinës.

Protestuesit marshuan drejt ndërtesës së parlamentit në Sheshin Syntagma për të protestuar kundër rregullores ligjore që ka planifikuar qeveria, e cila do të lejonte mundësinë një ditë pune 13-orëshe, 37 ditë në vit.

Duke kërkuar që dita aktuale e punës tetë-orëshe të mos rritet, protestuesit valëvitën flamuj palestinezë dhe brohoritën slogane si "Liri për Palestinën".

Sindikalistja palestineze Suzan Tayseer Salam gjithashtu iu drejtua protestuesve me një fjalim.

Salam deklaroi se rëndësia e solidaritetit global kuptohet shumë më qartë në Palestinën e pushtuar nga Izraeli, duke theksuar se "Ju sjell përshëndetje nga punëtorët palestinezë", ndërsa protestuesit u përgjigjën me brohoritjet "Liri për Palestinën".