Drejtori i përgjithshëm i Policisë së Kosovës, Gazmend Hoxha, ka deklaruar se së fundi janë regjistruar raste të fluturimeve të dronëve në pjesën veriore të Kosovës, për të cilat dyshohet erdhën nga territori i Serbisë, transmeton Anadolu.

Hoxha në një deklarim për media të premten tha se Policia është në kontakt të vazhdueshëm me KFOR-in dhe po kryen monitorime të situatës.

"Kohën e fundit kemi pasur fluturime të dronëve që ne po dyshojmë që po vijnë nga territori i Serbisë në pjesën veriore të Kosovës. Policia është në kontakt me KFOR-in, jemi duke bërë monitorimin për të parë se çfarë mund të bëhet", ka theksuar Hoxha.

Ai ka theksuar se rreziku ekziston për pjesën e kufirit, por jo për qytetarët, të cilët sipas tij janë të mbrojtur nga institucionet.

"Është e rrezikshme për pjesën e kufirit, por për qytetarët tanë në jug ne jemi duke i mbrojtur po ashtu. Ndërsa hapësira ajrore është përgjegjësi e KFOR-it", tha ai.

Hoxha tha se institucionet ndërkombëtare janë njoftuar për këtë situatë dhe se përgjegjësia i takon KFOR-it.

"Ne e kemi njoftuar KFOR-in dhe partnerët tanë, KFOR është përgjegjësi e tyre, janë duke punuar për këtë drejtim", shtoi Hoxha.

Shkeljen e kohëpaskohshme të hapësirës ajrore të Kosovës nga dronë të Serbisë, e ka konfirmuar dy ditë më parë ministri në detyrë i Punëve të Brendshme, Xhelal Sveçla.

Sveçla tha se shkeljet e hapësirës ajrore të Kosovës nëpërmjet dronëve janë në kuadër të kërcënimeve që Serbia në vazhdimësi i bën ndaj Kosovës.