Kryeministri i Shqipërisë, Edi Rama, ka deklaruar për një media të huaj se në të ardhmen e afërt do të shpallë planet për një entitet në Tiranë, që do të quhet Shteti Sovran i Urdhrit Bektashi, transmeton Anadolu.

Sipas artikullit të një media amerikane, artikull i konfirmuar për Anadolu nga zyra e shtypit e Kryeministrisë së Shqipërisë, shteti i ri i mundshëm në Tiranë, do të jetë një enklavë sovrane e modelit të Vatikanit.

"Kryeministri Edi Rama thotë se ai dëshiron t’u japë anëtarëve të Bektashinjve (Komuniteti Bektashi), një rend sufi shiit, enklavën e tyre të stilit të Vatikanit si një mënyrë për të promovuar tolerancën fetare", thuhet në shkrimin e medias amerikane.

Sipas medias, kryeministri Rama ka thënë se ”qëllimi i shtetit të ri ishte promovimi i një versioni tolerant të islamit për të cilin Shqipëria krenohet”.

“Ne duhet të kujdesemi për këtë thesar, që është toleranca fetare. Një mikroshtet i moderuar islamik, do të dërgonte një mesazh: 'Mos lejoni që stigma e muslimanëve të përcaktojë se cilët janë muslimanët'", citohet të ketë thënë Rama.

Sipas lajmit, një vend që ka shumë pak gjasa ta njohë shtetin e ri nëse krijohet është Irani. “Iranianët janë sinqerisht mendimi im i fundit”, është shprehur Rama, duke vënë në dukje se Shqipëria i ndërpreu marrëdhëniet diplomatike me Iranin në vitin 2022 pasi e lidhi këtë shtet me një sulm kibernetik ndaj Qeverisë shqiptare dhe rrjeteve bankare.

Gjithashtu theksohet se kryeministri Rama ka pranuar se ”krijimi i një shteti sovran islamik në Tiranë do të kërkonte kohë”.

Në Shqipëri ndodhet Selia e Kryegjyshatës Botërore Bektashiane. Sipas të dhënave të "Censit të Popullsisë dhe Banesave 2023 në Shqipëri", publikuar në qershor 2024 nga Instituti i Statistikave të Shqipërisë (INSTAT), në Shqipëri janë deklaruar bektashi 115.644 banorë të vendit, ku rezulton se popullsia banuese në vend është mbi 2,4 milionë banorë.