PRISHTINË (AA) - Kryeministri i Republikës së Kosovës, Ramush Haradinaj, priti në takim të ngarkuarin me punë të Katarit në Shqipëri, jo rezident në Kosovë, Hashim Ibrahim Al-Sada, transmeton Anadolu Agency (AA).

Në një komunikatë nga zyra e Kryeministrit thuhet se gjatë këtij takimi kryeministri Haradinaj ka falënderuar për përkrahjen që shteti i Katarit i ka dhënë Kosovës në të gjitha periudhat e rëndësishme që nga pavarësia dhe shtetndërtimi.

Haradinaj ka njoftuar ambasadorin Al-Sada për angazhimin e Qeverisë në forcimin dhe konsolidimin e vazhdueshëm të shtetit të Kosovës si dhe për zhvillimet dhe proceset që lidhen me axhendën euroatlantike me synim anëtarësimin e plotë të Kosovës në NATO dhe në BE.

Ai po ashtu ka shprehur gatishmërinë për thellimin e marrëdhënieve ndërmjet dy vendeve, sidomos në fushën e investimeve dhe zhvillimit ekonomik.

Nga ana e tij, ambasadori Hashim Ibrahim Al-Sada ka uruar kryeministrin Haradinaj për marrjen e përgjegjësive të reja, duke përcjellë edhe urimet e Kryeministrit të shtetit të Katarit.

Ambasadori Al-Sada po ashtu ka theksuar gatishmërinë e Katarit për vazhdimin e mbështetjes për Kosovën në të gjitha fushat, përfshirë përkrahjen për njohje të reja dhe anëtarësimin e Kosovës në organizatat ndërkombëtare.