Кениската методистичка црква ја потресе скандал со корупција од 4,6 милиони долари

НАЈРОБИ (АА) - Обемна ревизија откри еден од најголемите финансиски скандали во историјата на црквите во Кенија, во кој се вмешани високи претставници на Методистичката црква, осомничени за злоупотреба на повеќе од 600 милиони кениски шилинзи (приближно 4,6 милиони американски долари), пренесува Анадолу.

Како што јави весникот „Дејли нешн“, наодите произлегуваат од ревизија спроведена од „Роналдс ЛЛП“ и седумчлена комисија назначена од црквата.

Според извештајот, помошта со храна наменета за заедниците погодени од суша била систематски пренасочувана, при што високи црковни функционери наводно организирале сложена шема со фалсификувани сметки, фиктивни набавувачи и непостојни проекти.

Ревизорите утврдиле дека донираната храна била украдена и препродавана, а исплатите се вршеле кон компании за кои нема докази дека постојат.

Скандалот се случува во време кога верските организации во Кенија се соочуваат со сè поголем надзор за начинот на кој управуваат со донациите и јавните средства.

Кениската Комисија за етика и борба против корупцијата сè уште не објавила дали ќе отвори официјална истрага, но правните експерти оценуваат дека ревизорскиот извештај содржи доволно докази за поведување кривични постапки за измама, кражба и злоупотреба на службена положба.