Шефот на израелската дипломатија се закани дека „нема да дозволат“ да се спроведе решението за две држави

ЕРУСАЛИМ (АА) - Израелскиот министер за надворешни работи Гидеон Саар се закани дека „нема да дозволат“ да се спроведе решението за две држави по низата признавања на Палестина од европските и западните држави, известува Анадолу.

За американските медиуми израелскиот шеф на дипломатијата Саар изјави дека земјите што одлучиле да ја признаат Палестина „доколку сакаат може да основаат палестинска држава на своја територија“.

Министерот Саар во изјавата вели:

„Доколку големите земји, како Франција и Канада, сакаат да основаат палестинска држава на своја територија, можат; тие имаат многу простор за тоа“ и тврди дека окупираните палестински територии „му припаѓаат на Израел“.

„Палестинска држава во срцето на израелската територија навистина би било решение, но тоа би било решение за оние што сакаат да нè уништат“, изјави Саар.

Тврдејќи дека независна палестинска држава во границите од 1967 година со Источен Ерусалим како главен град, кој го држат под окупација, „сериозно би ги загрозила“ густо населените градови на Израел и би ја турнала неговата земја „назад кон неодбранливи граници“, Саар истакна: „Таквиот потег би бил самоубиство.“

Како одговор на чекорите преземени од некои земји за признавање на државата Палестина, израелскиот Парламент донесе „одлука што се спротивставува на едностраното признавање на државата Палестина“, која во февруари 2024 година беше прифатена од 99 пратеници, а во јули 2024 година од 68 пратеници.

Се зголемува меѓународниот притисок врз Владата во Тел Авив со достигнувањето на врвот на хуманитарната катастрофа во регионот поради нападите на Израел врз Појасот Газа и блокадата што ја наметна.

Земјите ја користат одлуката за признавање на независната држава Палестина како алатка за меѓународен притисок врз Израел и бараат прекин на неговите напади врз Појасот Газа и ставање крај на хуманитарната катастрофа што ја предизвика.

Девет земји членки на ОН официјално ја признаа државата Палестина по 7 октомври 2023 година.

Обединетото Кралство, Франција, Канада и Малта, исто така, соопштија дека ќе ја објават својата одлука за признавање на Палестина како „независна држава“ на Генералното собрание на ОН во септември.

Државата Палестина, под израелска окупација, е признаена од 147 од 193 земји членки на Обединетите нации (ОН) од прогласувањето на нејзината независност на 15 ноември 1988 година.