Дронови забележани над воена база во Белгија

БРИСЕЛ (АА) – Неколку дронови беа забележани над воена база во Белгија во саботата вечерта што предизвика загриженост за безбедноста, потврди денес белгискиот министер за одбрана Тео Франкен, јавува Анадолу.

„Нашиот стражарски пункт во Марше ан Фамен забележа повеќе дронови над критични делови од штабот на нашата армиска бригада во сабота вечерта, во текот на подолг временски период. Ова не беше работа на аматери, туку на искусни пилоти на дронови“, напиша Франкен на американската платформа за социјални медиуми X.

Тој додаде дека полицијата и Генералната служба за разузнавање и безбедност ја истражуваат оваа „загрижувачка ситуација“ над базата, која се наоѓа околу 113 километри југоисточно од Брисел.

„Летањето дронови над воени квартови е апсолутно забрането. Мора да имаме можност да ги отстраниме од воздухот,“ рече министерот.

Франкен, исто така, за фламандскиот весник Het Laatste Nieuws потврди дека „во тоа време имало четири или пет дрона“, нагласувајќи ја чувствителноста на областа.

„Нашите главни воени касарни и критична инфраструктура се сместени таму“, вели тој.

Инцидентот е трет последователен извештај за дронови забележани во близина на воени објекти во Белгија, по претходните набљудувања на кампот Елсенборн во источните кантони.

Потеклото на дроновите сè уште не е јасно. Иако постојат шпекулации за вмешаност на Русија, Франкен рече дека тоа не може да се потврди.

„Можам да кажам дека се работи за актери со злонамерни намери. Ова не е некој тинејџер што на шега го управува својот дрон за забава. Ова беше јасно организирана операција против срцето на нашата армија. Тие бараа клучни информации за критичната инфраструктура сместена во воениот објект,“ изјави Франкен.

Тој повика на употреба на оружје, како мрежи за дронови и пушки против дронови, нагласувајќи дека постојат некои капацитети, но тие се базирани на аеродроми и главно ги штитат леталата.

Инцидентот се случува и по неколку наводни нарушувања на воздушниот простор на европските земји од дронови последниве месеци, што ја зголеми напнатоста.

Русија ги негираше обвинувањата од европските официјални лица дека стои зад овие случувања.