ھۆشداری پوتین لە ئەگەری جەنگی نێوان ئەمریکا و ئێران

مۆسکۆ - AA

سەرۆکی رووسیا، ڤلادیمیر پوتین رایگەیاند کە شەڕ و پێکدادانی نێوان ئەمریکا و ئێران دەبێتە "کارەسات" و گوتیشی: "شەڕ و پێکدادانێکی بەم جۆرە، توندوتیژی و شەپۆلی پەنابەران زیاتر دەکات".

پوتین لە پرۆگرامێکی راستەوخۆدا لە ژێر ناوی "ھیڵی راستەخۆ" کە لە کەناڵ و رادیۆ بە شێوەیەکی ھاوبەش پەخش کرا وەڵامی پرسیارەکانی خەڵکی دایەوە و تێدا لە ماوەی چوار کاتژمێر و ھەشت خولەک وەڵامی ٨١ پرسیاری پەیوەندیدار بە سیاسەتی ناوخۆ و دەرەوەی دایەوە.

پوتین رایگەیاند کە ئەو ئامادەیە لەگەڵ سەرۆکی ئەمریکا، دۆناڵد ترەمپ کۆببێتەوە و گوتیشی: "رووسیا ئامادەیە دیالۆگ لەگەڵ ئەمریکا دروست بکات. زۆر پرس ھەیە کە دەکرێ گفتوگۆی لەسەر بکەین".

پوتین ھەڵسەنگاندنی بۆ لێدوانەکانی ئەمریکا لەبارەی دەستێوەردانی سەربازیی دژ بە ئێران کرد و گوتی: "ئەگەری شەڕی چەکداریی ئەمریکا و ئێران، دەبێتە کارەسات بۆ سەرجەم ناوچەکە و ئەنجامی ئەمە کاریگەری لەسەر ئەمریکاش دەبێت. شەڕ و پێکدادانێکی بەم جۆرە، توندوتیژی و شەپۆلی پەنابەران زیاتر دەکات".

پوتین باسی لە پرسی سووریا کرد و جەختی لەوە کردەوە کە پێویستە رووسیا، تورکیا، ئێران، ئەمریکا و وڵاتانی دیکە چارەسەریی سیاسی بۆ کێشەی سووریا بدۆزنەوە و کۆمیتەی دەستوور پێکبھێنرێ.