ئەنقەرە - AA

حکوومەتی ئەمریکا ڕایگەیاند بەهۆی ڕۆڵ بینینیان لە بازرگانی نەوتی ئێران، سزای نوێی بەسەر چەند کەس و دامەزراوەدا سەپاندووە.

وەزارەتی دەرەوەی ئەمریکا، ڕاگەیاندراوێکی سەبارەت بە بازرگانی نەوتی ئێران بڵاوکردەوە.

لە ڕاگەیاندراوەکەدا باس لەوە کراوە کە دوو بەڕێوەبەری کۆمپانیای نەوتی خاو و بەرهەمەکانی نەوت کە بنکەکەیان لە چینە و تۆمەتبارن بە ئاسانکاریی کردن بۆ هاوردەکردنی ملیۆنان بەرمیل نەوتی خاوی ئێرانی بۆ ژمارەیەکی زۆر لە تانکەر، خراونەتە لیستی سزاکانەوە و ئاماژە بەوەش کراوە کە ئەمە چوارهەمین پاکێجی سزایە بۆ سەر بازرگانان لە چین.

وەزارەتی خەزێنەی ئەمریکا لە ڕاگەیاندراوێکدا باسی لەوە کرد هاووڵاتی یۆنانی ئەنتۆنیۆس مارگارتیسی و ئەو کۆمپانیایانەی خاوەندارێتیان دەکات کە نزیکەی دوازدە کەشتین، بەهۆی ئەوەی پێگەی خۆی لە کەرتی دەریاییدا بەکارهێناوە بۆ گواستنەوەی نەوتی ئێران، خراونەتە لیستی سزاکانەوە.

لە ڕاگەیاندراوەکەدا هاتووە: "ئەم ڕێوشوێنانە توانای تاران بۆ دابینکردنی پارە بۆ بەرنامە چەکدارییە پێشکەوتووەکانی، پشتیوانی کردنی گرووپە تیرۆریستییەکان و هەڕەشەکردن لە سەلامەتی سەربازەکانمان و هاوپەیمانانمان لاواز دەکەن".

هەروەها لە ڕاگەیاندراوەکەدا جەخت لەسەر ئەوە کراوەتەوە کە وەزارەتەکە پێداگرە لە لێپرسینەوە لە هەرکەسێک بیەوێت هاوکاری ڕژێمی ئێران بکات و هەڕەشە لە ئاسایشی جیهانی بکات.