تاران - AA

سەرەڕای ئەو یاسایەی لە پەرلەمانی ئێران دەرچووە، ڕێگەدانی ئەنجوومەنی باڵای ئاسایشی نەتەوەیی وڵاتەکە بە چاودێرانی ئاژانسی نێودەوڵەتیی وزەی ئەتۆم بۆ ئەنجامدانی پشکنین لە ڕیئاکتۆری ئەتۆمی بوشەهر و ناوەندی توێژینەوەی تاران، مشتومڕی لەو وڵاتە لێکەوتەوە.

سەرۆکی پەرلەمانی ئێران، محەمەد باقر قالیباف لە ڕاگەیاندراوێکدا لە پەرلەمان ئاماژەی بەوە کرد کە ڕەزامەندی دراوە بە پشکنینەکان.

دوای ڕاگەیاندراوەکە، ژمارەیەک پەرلەمانتار ناڕەزاییان بەرامبەر بڕیارەکە دەربڕی و باسیان لەوە کرد ئەوە پێچەوانەی ئەو یاسایانەیە کە ئێستا هەن و پەیوەندییەکانی وڵات لەگەڵ ئاژانسی نێودەوڵەتیی وزەی ئەتۆم سنووردار دەکەن.

پەرلەمانتاری تاران، کامران غەزەنفەری کە کەسێکی موحافزکارە، ئاماژەی بەوە کرد بڕیارەکەی ئەنجوومەن کە بە سەرۆکایەتی سەرکۆمار مەسعوود پزیشکیان دراوە، پێچەوانەی یاسایە و ئەوان بابەتەکە دەبەنە دادگا.

پەرلەمانتارێکی دیکەی موحافزکار بە ناوی ئەمیر حوسێن سابتی، داوای لە وەزیری دەرەوەی وڵاتەکەی، عەباس عێراقچی کرد وردەکاریی ئەو ڕێککەوتنەی لەگەڵ ئاژانسی نێودەوڵەتیی وزەی ئەتۆم کراوە، ڕوون بکاتەوە.

هاوکات سابتی چاودێران و پشکنەرانی ئاژانسی نێودەوڵەتیی وزەی ئەتۆمی بە سیخوڕ تۆمەتبار کرد.