واشنتۆن ــ AA

وەزیری دەرەوەی ئەمریکا، مارکۆ ڕوبیۆ ڕایگەیاند، ناکرێت ئاڵوگۆڕی بەدیلگیراوەکان لە غەززە ئەنجامبدرێت، لە کاتێکدا شەڕ لە غەززە بەردەوامە.

مارکۆ ڕوبیۆ لە دیمانەیەکدا لەگەڵ تۆڕی "NBC"، گوتی: "دوای ئەوەی بزووتنەوەی حەماس ڕەزامەندی نیشاندا سەبارەت بە پێشنیارەکەی سەرۆک ترەمپ-ی لەبارەی کۆتاییھێنان بە شەڕی غەززە، لەئێستادا پرسە لۆجستییەکان تاوتوێ دەکرێن و ھیوادارین ئەم گفتوگۆیانە زۆر بە خێرایی کۆتایی پێبھێنرێت".

جەختی لەوەش کردووە کە پێویستە ئیسرائیل بۆردومانەکانی بۆ سەر غەززە بوەستێنێت.

گوتیشی: "ناکرێت ئاڵوگۆڕی بەدیلگیراوەکان لە غەززە ئەنجامبدرێت، لە کاتێکدا شەڕ لە غەززە بەردەوامە".