Twitter kufizon llogarinë e zëdhënësit të talebanëve

Në një lëvizje të papritur, Twitter ka kufizuar llogarinë e zëdhënësit të talebanëve, Zabihullah Mujahid, raporton Anadolu Agency (AA).

Gjiganti i mediave sociale citoi "disa aktivitete të pazakonta" nga llogaria e Mujahid-it si arsye për këtë veprim, që ndodhi disa minuta pasi ai dënoi një shpërthim vdekjeprurës në kryeqytetin afgan Kabul.

Zyrtarisht, Mujahid tani shërben si zv/ministër i Informacionit dhe Kulturës në qeverinë talebane në Afganistan. Megjithëse postimet e tij në gjuhën pashto dhe dari në Twitter janë kufizuar, llogaria e tij në gjuhën angleze e krijuar kohët e fundit është ende lehtësisht e shikueshme.

Ky veprim ka shkaktuar reagime të ndryshme mes afganëve.

Përkrahësit dhe anëtarët e talebanëve e kanë quajtur atë një shuplakë përballë lirisë së fjalës.

"Mbrojtësit e lirisë së fjalës dhe pretenduesit 'e rremë' tani duhet të qëndrojnë të përkushtuar ndaj fjalëve të tyre. Veprimet dhe fjalët e tyre janë po aq të ndryshme sa qielli dhe toka", shkroi një nga mbështetësit e tij në Twitter.

Të tjerët, duke përshëndetur lëvizjen, paraqitën argumentet e tyre në mënyra të ngjashme përmes postimeve.

"Zabihullah Mujahid, i cili ditë më parë merrte përgjegjësinë për sulmet terroriste kundër forcave afgane dhe civilëve, tani po dënon sulmet terroriste që synojnë atë dhe njerëzit e tij. Nëse mbillni oriz, do të korrni oriz", shkroi një përdorues në Twitter që përshëndeti bllokadën.

As Mujahid-i dhe as talebanët nuk janë prononcuar deri më tani për këtë zhvillim.